Neste primeiro día do curso, empezamos cunha actividade de achegamento para que os membros do grupo que chegaron tarde tivesen a oportunidade de integrarse. Esta actividade tamén serviu para establecer o rumbo do curso en si, prestando a cada persoa a oportunidade de autodefinirse e darse a coñecer nos seus propios termos.
A actividade consistiu en crear un círculo de memoria. Cada persoa tivo de dicir o seu nome, un adxectivo que empezase coa mesma letra do nome de pila e facer un movemento particular que lle definise dalgunha maneira. Logo, as persoas que seguían tiñan que facer o mesmo e lembrar a información de todas as persoas que lle precederon.
De aí, pasamos á avaliación das necesidades e expectativas de cada persoa coa creación dunha árbore de expectativas. Isabel, a coordinadora do grupo, debuxou unha gran árbore na lousa e deu a cada persoa tres post-it de cores distintas para que cada quen puxese o que esperaba conseguir do curso, o que pensaba que podía achegar e tamén o que máis temía.
Esta actividade pareceume moi proveitosa para as primeiras semanas do curso, porque, aínda que pode intimidar un pouco permitirse ser vulnerable e expresar temores, dá a sensación a cada persoa de que se lles ve e de que as súas necesidades e punto de vista serán tomados en conta.
Acabamos o primeiro día cun repaso da metodolgía xeral e con dúas últimas actividades moi interesantes.
Na primeira, formamos grupos pequenos para compartir entre nós información sobre a experiencia educativa nos nosos países, enfocándonos en tres categorías: as metodoloxías predominantes que guían o traballo en aula, os desafíos asociados coa diversidade do alumnado e a conexión entre os nosos centros e a comunidade que os rodea. Foi aquí que todos comezamos a entender que, a pesar das nosas diferenzas e particularidades culturais, vivimos experiencias e desafíos moi similares, pero tamén que as nosas formas de lidar con eses desafíos poden ser moi distintas.
Na última actividade, participamos nun padlet de diversidade. Coa aplicación de padlet, que permite crear un mapa interactivo, cada persoa puido sinalar tres ou catro sitios que lle definen dalgunha maneira: o lugar onde nacemos, onde traballamos, etc. Ademais de ser unha forma amena de acabar o día, esta actividade mostrounos a verdadeira riqueza que albergaba esa pequena aula, con experiencias e historias que ían desde E.E.U.U. ata Sudáfrica ou Mozambique.
